گلاب آنکھیں ، شراب آنکھیں
یہی تو ہیں لاجواب آنکھیں
اِنہیں میں الفت ، اِنہیں میں نفرت
ثواب آنکھیں ، عذاب آنکھیں
کبھی نظر میں بلا کی شوخی
کبھی سراپا حجاب آنکھیں .
کبھی چُھپاتی ہیں راز دل کے
کبھی ہیں دل کی کتاب آنکھیں
کسی نے دیکھی تو جھیل جیسی
کسی نے پائیں سراب آنکھیں
وە آئے تو لوگ مجھ سے بولے
حضور آنکھیں،جناب آنکھیں
عجیب تھا گفتگو کا عالم
سوال کوئی ، جواب آنکھیں
یہ مست مست بےمثال آنکھیں
مصوری کا کمال آنکھیں
شراب رب نے حرام کر دی
مگر کیوں رکھیں حلال آنکھیں ..
ہزاروں ان پہ قتل ہوئے ہیں
خدا کے بندے سنبھال آنکھیں
